空姐、絲襪。男讀者係咪聽到都有啲心跳？但其實，空姐同絲襪，一啲都唔match㗎，唔信？聽吓美國著名空姐Heather Poole點講。
英國報章《The Telegraph》訪問咗作家兼空姐Heather Poole，佢質疑點解航空公司係都要空姐着短裙，佢話着短裙就一定要着絲襪，但絲襪係相對易燃物料，而空姐係要負責機上安全，若果要撲滅航班上嘅火警，咪好危險？
聽落都有道理。佢仲話如果飛到好凍嘅地方，着住條裙喺街道等的士，真係凍到痹。
不過，航空公司似乎唔聽佢支笛。畀空姐着褲嘅航空公司已經唔多，《The Telegraph》話有啲原本放寬咗嘅航空公司，又收緊番，例如英航二○○四年已經准空姐着褲，但𠵱家除咗長途機部份空姐之外，其他一律唔准。公司仲話過去四年都冇任何空姐要求過着褲㖭。不過，都有航空公司提出中間路線，就係裙褲，例如法國航空公司La Compagnie。
一個着短裙絲襪、但行步路都舉步維艱、危急時救火都唔掂嘅空姐；一個着褲但行動便捷啲嘅空姐。你會點揀？（吓？佢哋邊個靚啲？呢個唔係重點喎！）
